Aklanon News: Tatlong grupo it mga kababayen-an ginpadunggan it AGADC

KALIBO, Aklan, Abril 23 (PIA) -- Tatlo nga daeayawon nga mga organisasyon it mga kababayen-an sa Aklan nga padayon sa pagtinguha ag pagsuporta sa mga kababayen-an sa tunga it pandemya it COVID-19 hay ginpadunggan kurundaya eamang it Aklan Gender and Development Commission (AGADC) sa ginpatigayon it probinsya nga culminating activity it Women's Month nga selebrasyon.

Ginhiwat ro culminating activity sa lobby it Aklan Provincial Capitol ku Marso 29.

Ro mga ginkomendar nga mga organisasyon, imaw man ro mga kababayen-an sa likod kara, hay ro Batan Rural Improvement Club (BRIC) nga gin organisar ag ginapamunuan ni Jindra Linda Demeterio, nagapamuno it Provincial Federation of Local Council of Women; Raquel's Pina Cloth, nga ginapanag-iyahan ni Raquel Eleserio, nga kilaea bilang Master for Pina Weaving; ag Handicrafts of Aklan Multi-Purpose Cooperative, nga ginapamunuan ni Emmely Lanzon.

Suno kay Engr. Lorna Cawaling it Provincial Planning and Development Office (PPD0) nga imaw man ro GAD Focal Point it Aklan, ginrekognisar ro mga asosasyon ngara ag ro mga nagapamuno kara nga mga babaye bangud sa andang pagtinguha nga magpadayon ro andang organisasyon agud ro andang mga trabahante ag miyembro nga eaban hay mga babaye hay gakita gihapon bisan nagapakigsukoe sa COVID-19 nga pandemya.

Ginhambae ni Cawaling nga agud ro mga kababayen-an sa Batan hay may kitaon gihapon, gin organisar ni Demeterio nga sangka mabuhay eon nga retirada nga Regional Director it Department of Agriculture (DA) 6 ro pagtililipon it mga miyembro it BRIC-Batan halin sa sari-saring barangay it banwa agud magbaligya ku andang mga hardin nga gintanum ku pag quarantine.

Sa parte ni Raquel Eliserio, nga kurundaya eamang hay hapadunggan man bilang International Awardee in Global Artisan Awards, ginkilaea imaw bangud sa nabaton nga pagpadungog ag sa pagtinguha nga padayon nga taw-an it trabaho ro ana nga mga manughaboe sa tiyempo ngara it pandemya. Ginpangtaw-an na man it mga groceries ro anong mga manug obra agud makabulig sa andang sitwasyon.

Si Emmely Lanzon man it HAMPCO hay ginrekognisar man bangud sa padayon nga pagbukas it kooperatiba ngara agud masustinir man ro industriya sa paghaboe ag sa padayon nga pagtrabaho ku mga manughaboe nanda.

Nagbaton ro mga awardees it Certificates of Recognition halin sa probinsya it Aklan.

Ro tema sa dag-on ngara nga selebrasyon it Women's Month hay "We Make Change Work for Women, Juana sa Pandemya, Kaya." (JSC/VGV/PIA6 Aklan)