Cebuano News: Beterano nga ma-ospital sa COVID-19 may P10,000 ayuda

TAGBILARAN CITY, Bohol, April 23 (PIA) -- Sa mas daghang mga edaran na nga nanga-angin ug natakdan sa Coronavirus disease (COVID), gipadayag sa Philippine Veterans Affairs Office (PVAO) sa Bohol pinaagi ni Mario Blasabas, hepe, nga adunay P10,000 nga hinabang alang sa mga sakop sa mga pensyonado nga sakop sa Veterans Federation of the Philippines (VFP), kon mahidangat sila sa tambalanan tungod sa COVID.

Gawas pa nianan, lain nga P10,000 ang madawat alang sa Health care Assistance sa mga sakop, kon ma-ospital labing menos sulod sa tulo ka adlaw, ug P20,000 kon ang pagka-confine molapas sa 15 ka adlaw.

HANGYO SA USBAW SA PENSYON. Gipalanog sa PVAO ug sa VFP ang tabang aron ikapalanog ug mapugos ang Senado sa pagpalusot sa balaodnon nga nangayog usbaw sa binuwan nga pension sa mga senior veterans gikan sa P5,000 nagdto na sa P20,000. (PIA Bohol)

Gawas pa niana, alang sa mga beterano nga nagkalisud, may gipanghatag sila nga grocery packs, bitamina ug mga personal protective equipment, aron dili na sila kinahanglan pang manggawas aron mamalit sa kinahanglanon ug ma-expose na hinuon sa pagtakod sa kagaw,

Kini samtang naga-awhag ang mga beterano nga sakop sa Philippine Veterans Affairs ug sa VFP sa tabang sa mga hingtungdan sa pagpalusot na sa Senado sa Senate Bill 1766 (SB 1766).

Ang SB1766 nangandoy nga madugangan ang dugay nang gidawat nga Old Age Pension sa mga Senior War Veterans gikan sa P5,000 ngadto na sa P20,000 ang buwan.

Kini maoy gipalanog sa tinugyanan sa PVAO sa Bohol nga si Mario Blasabas, atul sa Kapihan sa PIA sa miagi nga semana.

Kahinumduman nga niadtong Hulyo 2018, gihimo na sa Senate Committee on National Defense and Security ang pagtuki aron gunggong ang hangyo sa usbaw sa pensyon.

Gibutyag didto ni PVAO Administrator Ernesto Carolina nga ang bersyon niini sa Kongreso nga House Bill No. (HBN) 7525, isip hulip sa HBN 270, aprobado na sa ikatulo ug katapusang pagbasa sa Ubos Balay Balaoranan.

Paapas ni Carolina nga labing makahuloganan kini kon mapalusot na kay nagkadyutay na gayud ang mga senior nga beterano sa Ikaduhang Gubat sa Kalibutan, dala na sa ilang katiguwangon.

Napadayag na usa sa House Committee on Appropriations, ug sa Department of Budget and Management (DBM) nga may igo nga pundo na alang niini nga panginahanglan.

Gipadayag gani sa PVAO Administrator nga kon ikapatuman ang balaod niining tuiga, may igo sila nga natigom alang sa inisyal nga pagpadagan niini.

Una na usab nga gipasalig sa mga gitawag og veterans' champions nga sila Senador Gringo Honasan ug Ping Lacson nga ilang ipasukip ang enactment sa SBN 1766, bisan pa nga gipasalig ni Lacson nga ang pundo alang sa pagpatunhay sa pagpatuman niini, isukip na sa General Appropriations Act.

Kahinumduman nga ubos sa Republic Act No. 6948, nga gipasa niadto pang 1990 ug napaugmad sa Republic Act No. 7696 niadtong 1994, ang pension nga gilagda sa balaod naa pa sa Php 5,000 alang sa Old Age Pension.

Ang bersyon sa usbaw sa pension sa Ubos Balay Balaoranan nga giduso sa HBN 270 ni Cong. Geraldine Roman alang sa P20,000 nga binuwan nga pension.

Dinhi sa Boholo gibutyag ni Blasabas nga naa na lamang sa 46 ang kadaghanon sa World War 2 veternas, samtang 313 ang mga beterano nga naga-alagad sa nasud sa mga internal nga kampanya niini human sa WW II.

Sa kinatibuk-an nga 359, aduna pa usab 602 nga mga bawo sa asawa o beterano nga bana ang midawat sa pension dinhi.

Hinuon, kini nga ihap, magkunhod sa sunod nga mga tuig kay sanglit kining pension alang lamang sa mga beterano ug mabalhin sa ilang buhi nga kapikas, ug dili na mahimong ibalhin sa mga anak og mga nagsalig sa beterano, butyag ni Blasabas. (rahc/PIA-7/Bohol)